Saturday, April 21, 2012

மோகன்லாலின் விஸ்மாயா ஸ்டுடியோவில் ரஜினி & டீம்!!!

Saturday, April, 21, 2012
கோச்சடையான் டீம் இப்போது சித்ராஞ்சலி ஸ்டுடியோவிலிருந்து மோகன் லாலின் விஸ்மாயா ஸ்டுடியோவுக்கு இடம்பெயர்ந்துள்ளது.

இங்குதான் கோச்சடையான் போஸ்ட் புரொடக்ஷன் பணிகள் நடக்கவிருப்பதாக தயாரிப்பாளர் டாக்டர் முரளி மனோகர் தெரிவித்துள்ளார்.

திருவனந்தபுரத்தில் அரசுக்கு சொந்தமான சித்ராஞ்சலி ஸ்டுடியோவில் ஷூட்டிங்கை முடித்துக் கொண்ட சௌந்தர்யா, அடுத்து நடிகர் மோகன்லாலுக்குச் சொந்தமான விஸ்மாயா மேக்ஸ் அனிமேஷன் ஸ்டுடியோவில்தான் முக்கியமான வேலைகளை மேற்கொள்ளவிருக்கிறார்.

இதுகுறித்து தயாரிப்பாளர் முரளி மனோகர் கூறுகையில், "கோச்சடையான் ஷூட்டிங் திருவனந்தபுரத்தில் நடந்து வருகிறது. போஸ்ட் புரொடக்ஷன் பணிகள் விஸ்மாயா மேக்ஸில் நடக்க உள்ளது. உலகத் தரமான அனிமேஷன் தொழில்நுட்ப வசதிகள் இந்த ஸ்டுடியோவில் உள்ளன. படத்தின் முழுப் பணிகளையும் முடிக்கும் அளவுக்கு இங்கு வசதிகள் உள்ளன," என்று கூறியுள்ளார்.

ரஜினி - தீபிகா படுகோன் இருவருமே இப்போது திருவனந்தபுரத்தில் உள்ளனர். ஷூட்டிங் முடிந்ததும் நேராக நவீன கேரவனுக்குச் சென்றுவிடுகிறார் சூப்பர் ஸ்டார். பொதுவாக கேரவனை பயன்படுத்தாத அவர், இந்த முறை க்ளைமேட் மற்றும் மீடியா பரபரப்பை கருத்தில் கொண்டு பயன்படுத்த ஆரம்பித்துள்ளார்.

படத்தின் காட்சிகளை யாராவது சுட்டு இணையத்தில் வெளியிட்டுவிடப் போகிறார்கள் என்ற முன்யோசனையுடன், இந்த ஸ்டுடியோவில் உள்ள யாரும் செல்போன்கள் பயன்படுத்த தடை விதிக்கப்பட்டுள்ளது.

அடுத்த வார இறுதியில் படப்பிடிப்புப் பணிகள் முடிந்துவிடும் என்கிறார்கள். அடுத்து முழுக்க முழுக்க போஸ்ட் புரொடக்ஷன் வேலைதான்.

தனுஷின் அடுத்த படம் 'மரியான்'!!!

Saturday, April, 21, 2012
'3' படம் எதிர்பார்த்த வரவேற்பை பெறாவிட்டாலும், தனது அடுத்த படப்பணிகள் கவனம் செலுத்த ஆரம்பித்து இருக்கிறார் தனுஷ். '3' படத்தின் இந்தி பணிகள் ஒரு புறம் நடைபெற்று வருகிறது. விரைவில் அப்படம் இந்தியில் வெளியாக இருக்கிறது. '3' படத்தினை தொடர்ந்து தனுஷ் 'ராஜன்ஹா' என்னும் இந்தி படத்தில் நடிக்க இருக்கிறார். இதற்கான படப்பிடிப்பு வாரணாசியில் நடைபெற இருக்கிறது. தமிழில் பரத்பாலா இயக்க இருக்கும் படத்தில் தனுஷ் நடிக்க இருப்பதாக இருக்கிறார் என்று தகவல்கள் வெளியாகின. ஆனால் அப்படம் குறித்து, பிறகு எந்த ஒரு தகவலும் வெளியாகவில்லை. இந்நிலையில், தனுஷ் டிவிட்டரில், "தமிழில் எனது அடுத்த படத்திற்கு 'மரியான்' என்று தலைப்பிடப்பட்டு இருக்கிறது. 'வந்தே மாதரம்' ஆல்பத்தினை இயக்கிய பரத்பாலா இப்படத்தினை இயக்க இருக்கிறார். ஆஸ்கர் நாயகன் ஏ.ஆர்.ரஹ்மான் இசையமைக்க இருக்கிறார்" என்று தெரிவித்து இருக்கிறார். வெற்றிமாறன் இயக்கும் அடுத்த படத்திலும் நடிக்க இருப்பது குறித்து "வெற்றிமாறன் உடன் மீண்டும் இணைந்ததில் மகிழ்ச்சி. வெற்றிமாறன் இப்போது தான் கதையை தயார் செய்து வருகிறார். அவரது கதையை கேட்க ஆர்வமாக இருக்கிறேன்" என்று கூறி இருக்கிறார்.

அஜித்கூட கண்டிப்பா ஒரு படம் பண்ணணும்...! - ஏக்கத்தில் கௌதம்!!!

Saturday, April, 21, 2012
தமிழ் திரையுலகில் சமீபகாலமாக எந்த ஒரு இயக்குநரோ, நடிகையோ பேட்டி அளித்தால் அஜித்தை இயக்க வேண்டும், அஜித்துடன் நடிக்க வேண்டும் என்று சொல்வது வாடிக்கையாகி விட்டது. கௌதம் மேனன் அஜித்தை வைத்து இயக்க திட்டமிட்ட படம் கைவிடப்பட்டது. இருவருமே தங்களது அடுத்தடுத்த படங்களில் கவனம் செலுத்த ஆரம்பித்தார்கள். கௌதம் மேனனுக்கு அஜித்தை வைத்து படம் இயக்க வேண்டும் என்ற ஆசை மட்டும் போகவில்லை. அஜித் படம் குறித்து கௌதம் மேனன் கூறியதாவது, "எனக்கு அஜித்கூடவும் வொர்க் பண்ண ஆசை. அஜித்தைப் பத்தி நான் ஏதோ தப்பா சொன்னதா சோஷியல் மீடியாக்களில் வதந்தி. 'டேய் நீயா சொன்னே?'னு அவர் ரசிகர்கள் ஸ்டேட்டஸ் போட்டு மிரட்டுறாங்க. ஆனா, சமீபத்தில் அஜித்தைச் சந்திச்சப்ப, நான் என்ன பேசினேன்னு விவரமா சொன்னேன். 'விடுங்க கௌதம்... அதைப் பத்திலாம் நான் கண்டுக்கலை'ன்னார். அவர்கூட கண்டிப்பா ஒரு படம் பண்ணனும்!" என்று தெரிவித்து இருக்கிறார்.

யு/ஏ சான்று பெற்ற 'வழக்கு எண் 18/9' அடுத்த மாதம் ரிலீஸ்!!!!

Saturday, April, 21, 2012
பாலாஜி சக்திவேல் இயக்கத்தில் உருவாகி இருக்கும் 'வழக்கு எண் 18/9'-க்கு யு/ஏ சான்று கிடைத்திருக்கிறது. 'காதல்', 'கல்லூரி' போன்ற வெற்றி படங்களை இயக்கிய டைரக்டர் பாலாஜி சக்திவேல், சிறு இடைவெளிக்கு பிறகு இயக்கி இருக்கும் படம் 'வழக்கு எண் 18/9'. ஸ்ரீ, ஊர்மிளா, மிதுன், மனிஷா என்ற நான்கு புதுமுகங்கள் நடித்துள்ள இப்படத்தில், காதல் ப்ளஸ் மனதை உருக வைக்கும் கதைக்களத்தை உருவாக்கி இருக்கிறார் பாலாஜி சக்திவேல். திருப்பதி பிரதர்ஸ் மற்றும் யு.டி.வி இணைந்து இப்படத்தை தயாரித்துள்ளனர். ஆஸ்கர் விருது பெற்ற பிரசன்னா இப்படத்தின் மூலம் இசையமைப்பாளராக அறிமுகமாகி இருக்கிறார். படத்தின் ஷூட்டிங் எல்லாம் முடிந்து ரிலீஸூக்கான வேலைகள் நடந்து வந்த நிலையில், படத்தை தணிக்கை குழுவிற்கு அனுப்பியுள்ளனர். படத்தை பார்த்த தணிக்கை குழுவினர் யு/ஏ சான்று அளித்துள்ளனர். தணிக்கை சான்று கிடைத்துவிட்டதால் மே 4-ல் படத்தை ரிலீஸ் செய்ய உள்ளனர்.

'பில்லா-2'க்காக பிரமாதமாக சண்டைபோட்டு மிரட்டிய அஜித்!!!

Saturday, April, 21, 2012
'பில்லா-2' படத்தில் எதிர்பார்த்ததை காட்டிலும் சண்டைக்காட்சிகளில் அஜித் மிரட்டினார் என்று அப்படத்தின் சண்டை பயிற்சி ஒருங்கிணைப்பாளர் கெச்சா கம்பாக்டி கூறியுள்ளார். அஜித்தின் 'பில்லா' படம் வெற்றி சூப்பர் டூப்பர் ஹிட்டானதை தொடர்ந்து அதன் 2-ம் பாகமாக 'பில்லா-2' உருவாகி வருகிறது. 'உன்னைப்போல் ஒருவன்' டைரக்டர் சக்ரி டோலெட்டி இப்படத்தை இயக்குகிறார். அஜித் ஜோடியாக பார்வதி ஓமணக்குட்டன் நடிக்கிறார். இப்படத்தின் ஷூட்டிங் முடிந்து, ரிலீஸ்க்கான வேலைகள் மும்முரமாக நடந்து வருகிறது. இந்நிலையில் 'பில்லா-'வை காட்டிலும் 'பில்லா-2'வில் மிரட்டலான சண்டைக்காட்சிகளை படமாக்கியுள்ளனர். சமீபத்தில் யூ-ட்யூப்பில் வெளியான இப்படத்தின் டிரைலர் அனைவரையும் வியக்கத்தக்க வகையிலும் ஆச்சரியத்திலும் ஆழ்த்தியது. அந்த அளவுக்கு ஹாலிவுட் படங்களுக்கு சமமாக மிரட்டலான சண்டைக்காட்சிகளை படமாக்கியுள்ளனர்.

இதுகுறித்து இப்படத்திற்கு சண்டைக்காட்சி அமைத்து கொடுத்த ஜயிக்கா ஸ்டன்ட் குழுவின் ஒருங்கிணைப்பாளர் கெச்சா கம்பாக்டி கூறுகையில், தமிழ் சினிமாவில் இதுவரை இல்லாத அளவிற்கு மிரட்டலான சண்டைக்காட்சிகள் 'பில்லா-2'வில் இடம்பெற்று இருக்கிறது. அப்படி மிரட்டலான சண்டைக்காட்சிகளை அமைப்பது ஒன்றும் அவ்வளவு எளிதல்ல, அதற்கு படத்தின் ஹீரோவின் முழு ஒத்துழைப்பும் அவசியம். 'பில்லா-2' சண்டைக்காட்சிகளில் அஜித் பிரமாதமாக நடித்து கொடுத்தார். அதிலும் குறிப்பாக வித்யூத் ஜமாலுடன் அவர் மோதும் சண்டைக்காட்சிகள் ரொம்பவே மிரட்டலாக வந்திருக்கிறது. ஜார்ஜியாவில் சண்டைக்காட்சி படமாக்கியது ரொம்பவே சவாலாக அமைந்தது. அங்கு அதிகப்படியான பனிபடர்ந்து காணப்பட்டதால் ஷூட்டிங் நடத்த சிரமமாக இருந்தது. படத்தில் 75 சதவீத காட்சிகள் படமாக்கிவிடுவோம். திடீரென பனிபடர்ந்து விடும். இதனால் திரும்பவும் அந்தக்காட்சியை படமாக்குவோம் என்றார்.

டைரக்டர் சக்ரி டோலெட்டி பற்றி கெச்சா கூறுகையில், திறமையான டைரக்டர் சக்ரி. எந்த ஒரு காட்சியும் கச்சிதமாக இருக்க வேண்டும் என்று நினைப்பவர். அவர் நினைத்தபடி காட்சிகள் வர வரைக்கும் அதில் திருப்தி அடையமாட்டார். படப்பிடிப்பில் எங்களுக்கு முழு சுதந்திரம் கொடுத்துவிட்டார். அதனால் நாங்க நினைத்தபடி சண்டைக்காட்சிகளை அமைக்க முடிந்தது. அதற்காக அவருக்கு என் சார்பாகவும், எனது குழுவினர் சார்பாகவும் நன்றியை தெரிவித்து கொள்கிறேன். 'பில்லா-2' படம் மூலம் எங்களுக்கு நிறைய நட்பு வட்டாரம் கிடைத்திருக்கிறது. மீண்டும் சக்ரியுடன் இணைந்து பணியாற்ற ஆர்வமாய் இருக்கிறோம். அஜித் பற்றி சொல்ல வேண்டுமென்றால், அஜித் ரொம்ப ஆற்றல் மிக்கவர், பண்புள்ளவர், மரியாதை மிக்கவர், மற்றவர்களுடன் எளிதாக பழகும் நல்ல நண்பர். ஏற்கனவே அஜித்துடன் நாங்கள் பணியாற்றி இருக்கிறோம். மீண்டும் அவருடன் இணைந்து பணியாற்றியது மகிழ்ச்சியளிக்கிறது. எதையும் துணிந்து செய்யவும், அதற்கான முயற்சி மற்றும் ஆர்வம் அஜித்திடம் அதிகம் இருப்பதால், அவரை வைத்து சண்டைக்காட்சிகளை படமாக்க எங்களுக்கு ஈசியாக அமைந்தது. நாங்கள் நினைத்ததை காட்டிலும் அஜித் பிரமாதமாக சண்டைக்காட்சிகளில் நடித்து படக்குழுவினரையே மிரட்டிவிட்டார். தொடர்ந்து இந்திய மற்றும் தமிழ் படங்களில் பணியாற்ற ஆர்வமாய் இருக்கிறோம் என்று கூறியுள்ளார்.
ரொம்ப ஷார்ப்பா செதுக்கியிருக்கீங்களே..... ம்ம்ம் கலக்கிட்டீங்க டேவிட்!

திருவனந்தபுரத்தில் தீபிகா!!!

Saturday, April, 21, 2012
கோச்சடையான்' படப்பிடிப்பின் லண்டன் முதல் ஷெட்யூலில் தீபிகா படுகோன் பங்கேற்கவில்லை. காரணம் அவர் இந்திப் படத்தில் பிஸியாக இருந்தார். இப்போது இரண்டாவது ஷெட்யூல் கேரளாவில் தொடங்கியதுமே அவருக்கு அழைப்பு விடுத்தார் சௌந்தர்யா. அப்போது அவர் மணாலியில் 'Yeh Jawaani Hai Deewani' படப்பிடிப்பில் இருந்தார். தீபிகாவின் வேலை நான்கு தினங்கள்தான் என்பதால், இந்தி இயக்குநரிடம் அனுமதி கேட்டு திருவனந்தபுரம் வந்துவிட்டார் தீபிகா. ரஜினியுடன் அவர் நடிக்க வேண்டிய காட்சிகள் அவுட்டோர் தொடர்புடையவை அல்ல. முழுக்க ஸ்டுடியோவில் எடுக்க வேண்டியவை என்பதால், திருவனந்தபுரம் ஸ்டுடியோவில் வைத்து சௌந்தர்யா படமாக்கி வருகிறார். இன்றும் நாளையும் படப்பிடிப்பு முடிந்ததும், மீண்டும் இந்திப் படத்துக்குத் திரும்பிவிடுவாராம் தீபிகா. இருந்தாலும் அடுத்த ஷெட்யூலின்போது தீபிகாவால் வரமுடியாமல் போனால் என்ன செய்வது என்பதற்காக, கூடுதலாக சில காட்சிகளுக்கும் சேர்த்து நாளை ஷூட் செய்யப்போகிறாராம் சௌந்தர்யா. அனிமேஷன் என்பதால் ஸ்டுடியோவில் வைத்து மேட்ச் பண்ணிக் கொள்ளலாம் எனத் திட்டமாம்!

ஷாரூக்கானுக்கு நிகழ்ந்ததைப் போல அமெரிக்காவில் எனக்கும்தான் நடந்தது - கமல்!!!

Saturday, April, 21, 2012
அமெரிக்காவில் ஷாரூக்கானுக்கு நடந்ததைப் போன்ற அனுபவம் எனக்கும்தான் ஏற்பட்டது. அதற்காக நான் வருத்தப்படவில்லை. அந்த பிரச்சினையை நான் ரசிக்கிறேன். சொல்லப்போனால் என் பெயரையே Qamal Hassan என்று மாற்றப் போகிறேன், என்கிறார் உலக நாயகன் கமல்!

இந்தி நடிகர் ஷாருக்கானை அமெரிக்கர்கள் விமான நிலையத்தில் தடுத்து நிறுத்தி விசாரணை நடத்தினார்கள் அல்லவா. இதுபற்றி கமலிடம் கருத்து கேட்டபோது, "ஷாரூக்கானை மட்டுமா... என்னையும் கூடத்தான் சந்தேகமா பார்க்கிறார்கள் அமெரிக்கர்கள். அங்கு இது சகஜம்தான். இதுக்காக ஏன் டென்ஷனாகனும்," என்றார்.

அவர் மேலும் கூறுகையில், "எனது பெயரை உச்சரிக்கும்போது முஸ்லிம் பெயர்போல் தோன்றும். எனது தந்தை பெயர் வைக்கும் போதே இதுபோன்ற சந்தேகங்கள் வரும் என்று தெரிந்துதான் வைத்தார்.

அடிக்கடி என்னிடம் உனது பெயரை பற்றி யாரேனும் விசாரித்தார்களா? முஸ்லிம் என்று நினைத்தார்களா? என்று கேட்பார் அப்பா.

நான் அமெரிக்கா போகும்போதெல்லாம், எனது பெயரும் அமெரிக்கர்களுக்கு குழப்பத்தை ஏற்படுத்தியுள்ளது. ஷாருக்கானுக்கு விமான நிலையத்தில் நிகழ்ந்த சம்பவம் எனக்கும் ஏற்பட்டது. கனடா விமான நிலையத்தில் என்னைத் தடுத்து நிறுத்தினார்கள். அரை மணி நேரம் என்னிடம் கேள்விகள் கேட்டார்கள். இப்படியெல்லாம் குழப்பம் வரும் என்று தெரிந்தே எனக்கு இப்பெயரை என் தந்தை வைத்துள்ளார்.

எனது சகோதரர்களுக்கு சந்திரஹாசன், சாருஹாசன் என பெயர் வைத்து விட்டு எனக்கு மட்டும் குறும்புத்தனமாக இந்த பெயரை சூட்டியுள்ளார். எனது பெயரை இதுபோல் சந்தேகமாக பார்த்து குழம்புவதை ஒருவிதத்தில் நான் ரசிக்கிறேன். சந்தோஷமாகவும் இருக்கிறது.

என் பெயரே கியூ என்ற ஆங்கில எழுத்தை முதலில் வரும் வகையில் மாற்றப்போகிறேன். அப்படி பெயர் வைப்பதன் மூலம் பிரச்சினைகள் வரவேண்டும். அவற்றை கண்டு நான் ரசிக்க வேண்டும்.

அமெரிக்காவின் இரட்டை கோபுரம் தகர்க்கப்பட்ட சம்பவத்தினால் அங்குள்ளவர்கள் எச்சரிக்கையாக இருக்கின்றனர். அதனால்தான் ஷாருக்கானை தடுத்து நிறுத்தியுள்ளார்கள். அது இயல்புதானே. இன்னொன்று அதுபற்றி ஷாருக்கானே கவலைப்படவில்லை. அதற்குள் ஆயிரம் கருத்துகள்.

இதுபோன்ற விஷயங்களுக்கு இந்தியாவிலிருந்து அவசரப்பட்டு கருத்து தெரிவிப்பதை முதலில் நிறுத்த வேண்டும்.

ஆப்கானிஸ்தான் மாணவர்கள் நமது நாட்டில் எளிதாக ரூம் எடுத்து தங்கிவிட முடியுமா? இதை யாரும் யோசிக்கிறீர்களா... இதற்கு தீர்வு என்ன என்றாவது யோசிக்கிறோமா... அதனால் நம்மிடம் உள்ள மூடத்தனத்தை முதலில் அகற்றப் பார்க்க வேண்டும்," என்றார்.

இப்போதான் உங்கள் பட்டப்பெயர் பொருத்தமாக உள்ளது கமல் சார்!

கமிஷனர் அலுவலகத்தில் எஸ்ஏசி மனு - 'எங்களை நீக்கியது செல்லாது!!!

Saturday, April, 21, 2012
பட அதிபர்கள் எஸ்.ஏ.சந்திரசேகரன், எஸ்.தாணு, தேனப்பன் ஆகியோர் போலீஸ் கமிஷனர் திரிபாதியை நேற்று மாலை சந்தித்து மனு ஒன்றை கொடுத்தனர்.

கூடுதல் கமிஷனர் தாமரைக்கண்ணனையும் சந்தித்து பேசினார்கள்.

பின்னர் வெளியில் வந்த அவர்கள், நிருபர்களை சந்தித்தார்கள். அப்போது எஸ்ஏ சந்திரசேகரன் கூறுகையில், "தமிழ்நாடு திரைப்பட தயாரிப்பாளர்கள் சங்கத்தின் தேர்ந்தெடுக்கப்பட்ட நிர்வாகிகள் நாங்கள். எங்கள் சங்கத்தில் 750 தயாரிப்பாளர்கள் உறுப்பினர்களாக உள்ளனர். நான் 320 ஓட்டுகள் வாங்கி தலைவராக தேர்ந்தெடுக்கப்பட்டவன்.

எங்களை நீக்கி இருப்பதாக சொல்லி இருக்கிறார்கள். இது விளையாட்டு சமாச்சாரம் அல்ல. 15 நாட்களுக்கு முன்பு நோட்டீசு கொடுத்துதான் யாரையும் நீக்க முடியும். சங்கத்தின் செயல்பாடுகள் நடக்க வேண்டும்.

அது குறித்து கமிஷனரிடம் பேசினோம். நாங்கள் பாதுகாப்பு கேட்கவில்லை. எங்களுக்குள் பகை இல்லை. எங்கள் பிரச்சினையை நீதிமன்றம் தீர்த்து வைக்கும்," என்றார்.

எங்கும் ஓகே ஓகே ஜூரம்... சத்தமில்லாமல் 4 புதுப்படங்கள் ரிலீஸ்!!!

Saturday, April, 21, 2012
தமிழக தியேட்டர்களில் ஒரே சிரிப்பு சத்தம்.... கேன்டீன்களில் கலகலப்பு... பார்க்கிங் பாய்ஸ் கூட சந்தோஷமாக இருக்கிறார்கள். ஒரு கோடைத் திருவிழாவாக மாறிவிட்டது உதயநிதி - சந்தானம் நடிப்பில் வெளிவந்துள்ள ஒரு கல் ஒரு கண்ணாடி படத்தின் வெளியீடு.

வெள்ளிக்கிழமை அமெரிக்காவிலும் படம் வெளியாகிவிட்டது. வேண்டுமென்றேதான் அமெரிக்க ரிலீசை தள்ளிப் போட்டாராம் உதயநிதி.

முதலில் இங்கு படம் வெளியாகி நல்ல 'டாக்' உருவான பிறகு வெளியிட்டால், உலத நாடுகளில் வசூல் அள்ளும் என்ற வர்த்த ஐடியாதான் அது. நன்றாகவே ஒர்க் அவுட் ஆகியுள்ளது.

இப்படியொரு சூழலில் இந்த வாரமும் 4 படங்கள் வெளியாகின. பெரிய எதிர்ப்பார்ப்பில்லாமல் போய் பார்க்க வேண்டிய படங்கள்.

மாட்டுத்தாவணி, மை, அடுத்தது, ஊலலல்லா... ஆகியவைதான் அந்த மூன்று படங்கள்.

இவற்றில் மாட்டுத்தாவணி, ஒரு காலத்தில் ஹிட் இயக்குநராக இருந்த பவித்திரன் இயக்கியது. விமல் நடித்துள்ளார். தக்காளி சீனிவாசன் இயக்கியுள்ள படம் அடுத்தது.

ஏஎம் ரத்னத்தின் மகன் ஜோதி கிருஷ்ணா இயக்கி நடித்துள்ள படம் ஊலலல்லா.

வேலூரை மையமாக வைத்து எடுக்கப்பட்டுள்ள படம் மை. அரசியல்தான் மையக்கரு. சே ரா கோபாலன் என்பவர் இயக்கியுள்ளார்.

கவர்ச்சி என்பது மீனா காலத்தில் இருந்து இருக்கிறது.கவர்ச்சியாக நடிப்பது தவறல்ல -அஞ்சலி!!!

Saturday, April, 21, 2012
சுந்தர் சி. இயக்கும் புதிய படம் கலகலப்பு. இதில் விமல், சிவா, அஞ்சலி, ஒவியா, சந்தானம் நடிக்கின்றனர். இந்த படத்தின் பாடல் சி.டி. வெளியிட்டு விழா வடபழனி பிரசாத் லேப் திரையரங்கில் நடந்தது. படத்தில் நடித்த நடிகர், நடிகைகள் மற்றும் தொழில் நுட்ப கலைஞர்கள் பங்கேற்றனர்.

கலகலப்பு படத்தில் அஞ்சலியும், ஓவியாவும் கவர்ச்சியாக நடித்துள்ளனர். அவர்கள் அரை குறை ஆடையில் தோன்றும் படங்கள் சமீபத்தில் வெளியாகி திரையுலகினரை அதிர வைத்தது. விழாவில் நடிகை அஞ்சலியிடம் இதுபற்றி கேட்ட போது அவர் கூறியதாவது:-

கவர்ச்சி என்பது மீனா காலத்தில் இருந்து இருக்கிறது. அழகாக காட்டுவது தான் கவர்ச்சி எனக்கு படத்தில் நல்ல ரோல்.. ஒரு பாடல் காட்சியில் அது போல் நடிக்க வேண்டிய இருந்ததால் நடித்தேன். அது தவறல்ல. இது வித்தியாசமான கல கலப்பான படம். நான் கலர்புல் நாயகியாக வருகிறேன். இவ்வாறு அவர் கூறினார்.

இயக்குனர் சுந்தர் சி. கூறும் போது பாடல் காட்சியில் கவர்ச்சியாக நடிக்க வேண்டும் என்று அஞ்சலியிடமும், ஓவியாவிடமும் கேட்டேன். அவர்கள் சம்மதித்தனர். அதற்கான உடைகளை கூட அவர்களே தயார் செய்தார்கள். ஒவ்வொருத்தரும் கதையை உருவாக்கும் போது கேரக்டர்களுக்கு அந்தந்த நடிகர்களை கற்பனை செய்து வைத்திருப்பார்கள்.

இந்த படத்துக்கு நான் யாரெல்லாம் நடிக்க வேண்டும் என்று கதையை உருவாக்கிய போது நினைத்தேனோ அவர்களெல்லாம் கிடைத்தனர். சிறு கேரக்டரில் நடித்தவர்கள் கூட சிறப்பாக நடித்துள்ளனர் என்றார்.

நடிகர்கள் விமல், சிவா, நடிகை ஓவியா, இசையமைப்பாளர் விஜய் எபிநேசர், ஒளிப்பதிவாளர் யு.கே. செந்தில்குமார், தயாரிப்பாளர் தனஞ்செயன் ஆகியோரும் பேசினர்.