Friday, January 27, 2012

நண்பன் படத்திற்கு எதிராக உண்ணாவிரத போராட்டம்!!!

நடிகர் விஜய் நடித்த "நண்பன் படத்தில் ஆண்டி, பண்டாரம் என ஜாதியின் பெயரை குறித்து வசனங்கள் வருவதால், அவற்றை நீக்கக் கோரி விரைவில் உண்ணாவிரதப் போராட்டம் நடத்த தமிழ்நாடு மிகப் பிற்படுத்தப்பட்டோர் நலக் கூட்டமைப்பு முடிவு செய்துள்ளது. திரைப்பட தயாரிப்பாளர்கள் சங்கத் தலைவர் சந்திரசேகர், இயக்குனர் ஷங்கர் மற்றும் தணிக்கைக் குழு உறுப்பினர்களுக்கு அக்கூட்டமைப்பின் தலைவர் சேம நாராயணன் அனுப்பியுள்ள கடிதம்: மிகவும் பிற்படுத்தப்பட்டோர் சமுதாயத்தை சேர்ந்த ஆண்டி, பண்டார சமூகத்தினர்கள் தமிழகத்தில் பரவலாக உள்ளனர். அவர்கள் கல்வி, வேலை வாய்ப்புகளைப் பெற்று வாழ்ந்து வருகின்றனர்.

நண்பன் திரைப்படத்தில் சில காட்சிகளில் ஆண்டி, பண்டாரம் என ஜாதியின் பெயரை குறித்து வரும் வசனங்கள் அச்சமுதாய மக்கள் மனம் புண்படும் அளவிற்கு அமைந்துள்ளது. ஆண்டி என்றும், பண்டாரம் என்றும் வரும் அந்த வார்த்தைகளையும், பாரி, பூரி, கக்கூஸ் நாரி என்ற வார்த்தைகளையும் அப்படத்தில் இருந்து நீக்க வேண்டும். அந்த வசனத்தை நீக்கவில்லை என்றால் உண்ணாவிரதப் போராட்டம் நடத்த முடிவு செய்துள்ளோம். இவ்வாறு கடிதத்தில் கூறியுள்ளார்.

புயல் நிவாரண நிதிக்கு ஜெ.விடம் ரூ.10 லட்சம் கொடுத்த ரஜினிகாந்த்!!!

சூப்பர் ஸ்டார் ரஜினிகாந்த் இன்று தமிழக முதல்வர் ஜெயலலிதாவை தலைமைச் செயலகத்தில் சந்தித்து தானே புயல் நிவாரண நிதிக்காக ரூ.10 லட்சத்திற்கான காசோலையை கொடுத்தார்.

கடந்த டிசம்பர் மாதம் 30ம் தேதி வீசிய தானே புயலால் தமிழகத்தில் கடலூர், விழுப்புரம் மாவட்டங்கள் மற்றும் புதுவையில் பெரும் சேதம் ஏற்பட்டது. இந்த புயலுக்கு 48 பேர் பலியாகினர். பலர் வீடுகளை இழந்து தவித்து வருகின்றனர். பயிர்கள் சேதமடைந்ததால் விவசாயிகள் கவலையில் ஆழ்ந்துள்ளனர். கடலூர் மாவட்டம் தற்போது தான் ஓரளவு மீண்டு வந்து கொண்டிருக்கிறது. புயலால் பாதிக்கப்பட்டவர்களுக்கு தமிழக அரசு நிவாரண நிதி வழங்கி வருகிறது.

இந்நிலையில் தானே புயல் நிவாரண நிதிக்கு தானும் ஏதேனும் கொடுக்க வேண்டும் என்று சூப்பர் ஸ்டார் ரஜினிகாந்த் நினைத்தார். இதையடுத்து அவர் இன்று தலைமைச் செயலகத்திற்கு சென்று முதல்வர் ஜெயலலிதாவை சந்தித்து அவரிடம் ரூ.10 லட்சத்திற்கான காசோலையை வழங்கினார். அப்போது உயர் அதிகாரிகள் பலர் உடன் இருந்தனர்.

அதன் பின்னர் செய்தியாளர்களிடம் பேசிய ரஜினிகாந்த் கூறியதாவது, முதல்வர் ஜெயலலிதாவை மரியாதை நிமித்தமாகத் தான் சந்தித்தேன். எனது உடல் நலம் தேற வாழ்த்து தெரிவித்ததற்கு நன்றி கூறினேன். விரைவில் புதிய படம் மூலம் எனது ரசிகர்களை சந்திப்பேன் என்றார்.

உடல் நலம் தேறிய பிறகு ரஜினிகாந்த் ஜெயலலிதாவை சந்திப்பது இதுவே முதல் முறையாகும்.

தமன்னாவும், பக்திப் பழமும்!!!

நடிகை தமன்னா தற்போது பக்திப் பழமாகி விட்டாராம். எப்பப் பார்த்தாலும் ஹோமம், புனஸ்காரம் என்று புகையும், பூஜையுமாக பிசியாக இருக்கிறாராம்.

ஒரு காலத்தில் தமன்னாவுக்கு தமிழில் அத்தனை மவுசு இருந்தது. ஆனால் தற்போது நிலைமை தலைகீழாக மாறிவிட்டது. தனுஷுடன் ஜோடி சேர்ந்து நடித்த வேங்கைக்குப் பிறகு அவருக்கு தமிழில் வாய்ப்புகள் வந்ததாகத் தெரியவில்லை. ஆனால் அம்மணி தெலுங்கில் பிசியாகத் தான் இருக்கிறார். சும்மா ஓடி, ஓடி நடிக்கிறார்.

ஆனால் தற்போது தமன்னாவைப் பார்ப்பவர்கள் என்னாச்சு இந்த பொண்ணுக்கு இப்படி பக்தி மானாய் மாறிவிட்டதே என்று ஆச்சரியப்படுகிறார்களாம்.

என்ன நம்ப முடியவில்லையா, அட நம்புங்கப்பா. ஹைதராபாத் வந்தால் போதும் தமன்னா கோவில் கோவிலாக ஏறி இறங்குகிறாராம். அட அப்படி என்ன தான் உருகி, உருகி வேண்டுகிறார் என்று தான் தெரியவில்லை.

மும்பைக்கு சென்றால் தனது வீட்டில் ஹோமம், பூஜை நடத்துகிறாராம். தற்போது தமன்னா இருக்குமிடம், போகுமிடமெல்லாம் பக்தி மயமாக உள்ளது.

பார்த்து, புகை ஜாஸ்தியாக கண்ணைக் கெடுத்துடப் போகுது...!

ஆட்டம் போடும் அமலா பால்... அதிர்ந்து நிற்கும் தயாரிப்பாளர்கள்!!!

தமிழ் சினிமா எத்தனையோ சாதனையாளர்களை தடவிக் கொடுத்து மகிழ்ந்திருக்கிறது... தீராத தலைவலியாய் திகழ்ந்தவர்களை சுளுக்கெடுத்தும் அனுப்பியுள்ளது.

தமிழ் சினிமாவின் இப்போதைய பெரும் தலைவலியாக உருவெடுத்துள்ளவர் அமலா பால். அம்மணி அலட்டும் அலட்டல் இருக்கிறதே.... இவரை நம்பி ஒப்பந்தம் செய்து படமெடுத்து வரும் தயாரிப்பாளர்களை அதிர வைத்திருக்கிறது.

வீரசேகரன் என்ற படத்தின் மூலம் நடிக்க வந்தவர் அமலா பால். இப்போது கேட்டால் 'ஆங்... அப்டி ஒரு படம் வந்ததா' என்பார். இந்தப் படத்துக்குப் பிறகு அம்மணி நடித்த படம் மாமனாரின் இன்பவெறி..சாரி.. சிந்து சமவெளி!

அதன் பிறகு சீந்துவாரின்றி கிடந்த அமலா பாலுக்கு வாழ்க்கை கொடுத்த படம் மைனா. போகிற இடமெல்லாம் மைனாதான் எனது முதல் படமாக்கும் என்று சொல்ல அமலா தயங்குவதே இல்லை. சரி அது அவர் விருப்பம். இப்போது விஷயம் ரொம்ப சீரியஸானது. அமலா பாலின் கேரியரையே காலி பண்ணும் அளவுக்கு!

சின்னதோ பெரியதோ.. ஒரு படத்தில் நடிக்க ஒப்புக் கொண்டால், அந்தப் படம் வெளியாகும்போது செய்யப்பட்டம் இசைவெளியீடு போன்ற புரமோஷனல் நிகழ்ச்சிகள், பிரஸ் மீட், சேனல் பேட்டி என அனைத்துக்கும் நடிகைகள் வரவேண்டும் என்பது தயாரிப்பாளர்கள் முன்கூட்டியே போடும் நிபந்தனை. இதற்கு ஒப்புக்கொண்டுதான் நடிக்க வருகிறார்கள் நடிகைகள்.

பெரும்பாலானோர் ஒப்புக் கொண்டபடி நடந்துகொள்கின்றனர். ஆனால் அமலா பால் போன்றோர் டிமிக்கி கொடுத்து தயாரிப்பாளரை அசிங்கப்படுத்துகின்றனர் (அமலா போன்றவர்களை தலையில் தூக்கி வைத்து ஆடும் இவர்களுக்கு இதுவும் வேணும்).

மைனா ஹிட்டானதிலிருந்தே தலைகால் புரியாமல் நடந்து கொள்ளும் அமலா பால், பத்திரிகையாளர் சந்திப்புகள் மற்றும் ஆடியோ வெளியீட்டு விழாக்களுக்கு வர ரொம்பவே பிகு பண்ணுவது வழக்கம்.

இப்படித்தான் தெய்வத் திருமகள் பிரஸ்மீட்டுக்கு வந்த அமலா பாலை புகைப்படக்காரர்கள் படமெடுக்க முயன்றபோது, 'எனக்கு மூட் இல்ல... போங்க போங்க' என்று விரட்டினார். அடுத்த நாள் இயக்குநர் விஜய்யுடன் ஒரு விருது வழங்கும் விழாவுக்கு வந்தார். அங்கும் படமெடுக்க முயன்றவர்களை கோபமாகத் திட்டிவிட்டு ஓடினார்.

ஒரு முறை இருமுறை அல்ல... மைனாவுக்குப் பின் அமலா பால் நடித்த தெய்வத் திருமகள், வேட்டை, இப்போது நடித்துக் கொண்டிருக்கும் முப்பொழுதும் உன் கற்பனைகள் மற்றும் காதலில் சொதப்புவது எப்படி ஆகிய படங்களின் பிரஸ் மீட்களில் இதுவே அமலா பாலின் வாடிக்கையாகிவிட்டது.

குறிப்பாக முப்பொழுதும் உன் கற்பனைகள் படத்துக்கான சேனல் இன்டர்வியூவுக்கு தயாரிப்பாளரின் பணத்தில் கேரளாவிலிருந்து விமானத்தில் வந்த அமலா, இரண்டு டிவி சேனலுக்குதான் பேட்டி தருவேன் என்று கூறிவிட்டாராம். அதுவும் எப்படி... 9 மணிக்கு வரவேண்டியவர்... 11 மணிக்கு வந்துவிட்டு, இப்படி ஜம்பமாய் சொல்ல, வந்திருந்த மற்ற டிவி சேனல்காரர்கள் கடுப்பாகி, பேட்டியெடுக்க முயன்றபோது, "உங்க சேனலை யார் பாக்குறாங்க... நான் பெரிய சேனல்களுக்குத்தான் தருவேன். உங்களுக்கு பேட்டி தரமுடியாது" என்று கூறிவிட்டார். இத்தனைக்கும் தமிழில் பிரபலமான சேனல்கள் அவை.

அமலா பாலின் இந்த நடவடிக்கையால் கடுப்பான சேனல்காரர்கள் கேமராவை ஏறக்கட்ட தயாரிப்பாளரும் இயக்குநருமான எல்ரெட் குமார் பதறியபடி சமாதானம் செய்ய முயன்றார். அதற்கு மீண்டும் ஒரு குண்டை தூக்கிப் போட்டார் அமலா. "சார் எனக்கு பர்சனல் வொர்க் இருக்கு. நான் போறேன்," என்று கூறிவிட்டு போயே போய்விட்டார். டிக்கெட் செலவு தயாரிப்பாளர் காசு... பார்ப்பது சொந்த வேலை... சேனல் மீட்டும் கெட்டது. இதெப்டி இருக்கு!

அடுத்த நாளே இன்னொரு நிகழ்ச்சி... இது நடந்தது காதலில் சொதப்புவது எப்படி பட இசை வெளியீட்டு விழாவில். படத்தின் நாயகியான இவர் விழாவுக்கே வராததால் நிகழ்ச்சி சொதப்பலாகிவிட்டது. விஷயத்தைக் கேட்டபோது, இன்று மாலை தனக்கு அரியர்ஸ் எக்ஸாம் இருப்பதால் வர முடியாது என அமலா கூறிவிட்டார் என்றார்கள்.

"குருவாயூரப்பன் ஊரில் பிறந்தால் லாஜிக்கே இல்லாமல் பொய் புளுகுவது சகஜம் போலிருக்கிறது. கேரளாவில் இப்போது எந்த தேர்வும் நடக்காது. இன்னொன்று, மாலை நேரத்தில் எந்த கல்லூரி அல்லது நிறுவனத்தில் தேர்வு நடக்கிறதென்று புரியவில்லையே," என்று கமெண்ட் அடித்தார் படக்குழுவைச் சேர்ந்தவர்.

இப்படி அடுக்கடுக்காக வரும் புகார்களால், அடுத்து அமலா பாலை ஒப்பந்தம் செய்ய தயாரிப்பாளர்கள் தயங்க ஆரம்பித்துள்ளனர். அமலா இப்போது இரண்டு தெலுங்குப் படங்கள் பண்ணுகிறார். அவரது கால்ஷீட்டுக்கு காத்திருந்த இரண்டு தமிழ் தயாரிப்பாளர்கள், 'பரவாயில்லை, அமலா ஹைதராபாதிலேயே இருக்கட்டும்' என்று முடிவு செய்து வேறு நடிகைகளை ஒப்பந்தம் செய்துவிட்டது லேட்டஸ்ட் சங்கதி!

அமலாவின் அலம்பல்களை பத்திரிகையாளர்களும் புகைப்படக்காரர்களும் வெளியில் சொல்லி அது செய்தியாக வந்ததும், உடனடியாக தனக்கு வேண்டப்பட்ட சில மலையாள நிருபர்களைக் கொண்டு அமலா அப்படியாக்கும் இப்படியாக்கும் என செய்தி வெளியிட ஆரம்பித்துள்ளது இன்னொரு பெரிய கதை!