Sunday, April 8, 2012

'பெப்சி' விவகாரத்தில் என்னைப் பயமுறுத்தப் பார்க்கிறார் பாரதிராஜா-அமீர் புகார்!!!

Sunday, April, 08, 2012
சென்னை::பெப்சி தொழிலாளர்கள் விவகாரத்தில் எனது போக்கு பிடிக்காத காரணத்தால், தனது அன்னக்கொடியும் கொடிவீரனும் படத்திலிருந்து என்னை நீக்கி என்னை பயமுறுத்தப் பார்க்கிறார் இயக்குநர் பாரதிராஜா. ஆனால் இதற்கெல்லாம் நான் பயப்பட மாட்டேன் என்று இயக்குநர் அமீர் கூறியுள்ளார்.

பெப்சி தொழிலாளர்கள், திரைப்படத் தயாரிப்பாளர்கள் விவகாரம் நாளுக்கு நாள் விஸ்வரூபம் எடுத்துக் கொண்டிருக்கிறது. இந்தப் பிரச்சினையில் முதல்வர் ஜெயலலிதா தலையிடுவார், நமக்கு சாதகமாக செயல்படுவார் என்று தயாரிப்பாளர்கள் சங்கம் நினைத்தது. இருப்பினும் ஜெயலலிதா இதைக் கண்டு கொள்ளவில்லை. இருப்பினும் தொழிலாளர் நலத்துறை வசம் இப்பிரச்சினையை அது ஒப்படைத்துள்ளது.

தொழிலாளர் நலத்துறை தரப்பில் பேச்சுவார்த்தைகளும் நடந்துள்ளன. ஆனால் தொழிலாளர் நலத்துறையினர் தங்களை அவமானப்படுத்தும் வகையில் நடத்துவதாக தயாரிப்பாளர் சங்க நிர்வாகி ராஜன் குற்றம் சாட்டியுள்ளார். இந்த நிலையில், தற்போது பெப்சிக்குப் போட்டியாக தயாரிப்பாளர்கள் ஒரு சங்கத்தை ஆரம்பித்து படப்பிடிப்புகளை நடத்தி வருகின்றனர்.

இந்த நிலையில் இயக்குநர் பாரதிராஜாவுக்கும், அமீருக்கும் இடையிலான மோதல் முற்றத் தொடங்கியுள்ளது. ஆரம்பத்திலிருந்தே இந்த இரண்டு பேருக்கும் ஒத்துப் போகாது, அது ஏன் என்று தெரியவில்லை. ஆனால் அதையும் மீறி தனது அன்னக்கொடியும், கொடிவீரனும் படத்தின் நாயகனாக அமீரை புக் செய்தார் பாரதிராஜா.அப்போதே பலருக்கும் சந்தேகம், இது ஒத்துவருமா, நடக்குமா என்று.

இப்போது பெப்சி விவகாரத்தை வைத்து இரண்டு பேரும் பிரிந்து விட்டனர். பெப்சிக்கு படு தீவிர ஆதரவு கொடுத்து வரும் அமீரை வைத்து படம் எடுப்பதா என்று தயாரிப்பாளர்கள் சங்கத் தரப்பில் பாரதிராஜாவுக்கு கடும் நெருக்கடி கொடுத்து வருவதாக கேள்வி. பாரதிராஜாவுக்குமே கூட அமீர் பெப்சிக்கு தீவிர ஆதரவு தெரிவிப்பதில் எரிச்சல்தான் என்றும் கூறப்படுகிறது. இதையடுத்து தற்போது அன்னக்கொடி படத்திலிருந்து அமீ்ரை தூக்கி விட்டார் பாரதிராஜா.

இதுகுறித்து அமீர் கருத்து தெரிவித்துள்ளார். அவர் கூறுகையில், தயாரிப்பாளர்களுக்கும், பெப்சி தொழிலாளர்களுக்கும் இடையில் நடக்கும் பிரச்சனையில் நான் தொழிலாளர்கள் பக்கம் நிற்கிறேன். இது பாரதிராஜாவுக்கு பிடிக்கவில்லை. நான் தொழிலாளர் பக்கம் நின்றது தவறு என்று கருதி என்னை படத்திலிருந்து நீக்கிவிட்டார்.

நான் தொழிலாளர் பக்கம் நின்றது தவறு என்றால் தொடர்ந்து அந்த தவறைச் செய்வேன். தனது படத்திலிருந்து தூக்கி என்னை பயமுறுத்துகிறார் பாரதிராஜா. ஆனால் நான் அவருக்கு பயப்படமாட்டேன். தொடர்ந்து தொழிலாளர்கள் நலனுக்காக குரல் கொடுப்பேன்.

பெப்சி விவகாரத்தில் தற்போது தமிழக அரசு தலையிட்டுள்ளது. மாநில தொழிலாளர் நலத்துறை அமைச்சர் முன்னிலையில் விரைவில் பேச்சுவார்த்தை நடைபெறவுள்ளது. அப்போது சுமூக முடிவு காணப்படும் என்றார்.

நயன்தாராவின் மாஸ்டர் ப்ளான்!!!

Sunday, April, 08, 2012
சென்னை::தனது காதல் விவகாரத்தை நாளுக்கு நாள் பூதாகரமாக்கி வருவதில் இங்குள்ள மேனேஜர் ஒருவருக்கும் அவரது சிச்யகோடி ஒருவருக்கும் பெருத்த பங்கிருப்பதாக சந்தேகப்படுகிறாராம் நயன்தாரா. அவரை காதலிக்கிறார், இவரை காதலிக்கிறார் என்றெல்லாம் கொளுத்திப் போடுவதும் மேற்படி நபர்களான இருவரும்தானாம். சந்தர்ப்பம் வரும்போது வைத்துக் கொள்கிறேன் அவர்களை என்று அனல் கக்குகிறாராம் நயன். இதற்கிடையில் இன்னொரு தகவலும் உலா வருகிறது கோடம்பாக்கத்தில். பிரபுதேவா- நயன்தாரா ஃபைட்டே ஒரு நாடகம்தான் என்கிறார்கள் அவர்கள். இதென்னங்க புது பொம்மலாட்டமா இருக்கு? ஆமாம்... நயன்தாராவின் பேங்க் பேலன்ஸ், மன்னாரன் கம்பெனி பைனான்ஸ் நிறுவனம் லெவலுக்கு இறங்கி போயிருக்கிறதாம். இப்போதைக்கு நடிப்பில் இறங்கி பத்து இருபது கோடியை தேற்றினால்தான் உண்டு என்பதாலும், பிரபுதேவாவுடனான உறவு தொடர்கிற பட்சத்தில் கோடம்பாக்கத்தில் வாய்ப்பு கிடைக்கப் போவதில்லை என்பதாலும் இருவரும் டிராமா ஆடுவதாக கிசுகிசுக்கிறார்கள். 'நீ அடிக்கிற மாதிரி அடி நான் அழுகிற மாதிரி அழுகிறேன்..'னு ரெண்டு பேரும் சேர்ந்து கல்லா கட்டிக்கிடலாம் போட்ட ப்ளான்தான் இது! ஓ... எப்டியெல்லாம் ப்ளான் போடுறாங்கய்யா..... பொழச்சிக்கிட்டா சரி... புட்டுக்கிட்டா...?!

கருணாஸ் தயாரித்து, ஹீரோவாக நடிக்கும் படம் ‘ரகளைபுரம்!!!

Sunday, April, 08, 2012
சென்னை::காமெடி நடிகர்களில் ரொம்பவே புத்திசாலித்தனமானவர் என்றால் கருணாஸை சொல்லலாம். முகம் சுளிக்க வைக்காத சுத்தமான பொழுதுபோக்குப் படங்களைத் தரவேண்டும் என வாய்ப்பு கிடைக்கும் போதெல்லாம் சொல்லி வரும் கருணாஸ், அதற்கு தன்னாலான முயற்சியையும் செய்யத் தவறுவதில்லை. அவர் ஹீரோவாக நடித்த 'திண்டுக்கல் சாரதி', 'அம்பாசமுத்திரம் அம்பானி' போன்ற படங்கள் முதலுக்கு மோசமில்லாமல் ஓடியதுடன், குடும்பத்தோடு பார்க்கலாம் என தைரியமாக சொல்ல வைத்தன. இதில் 'அம்பாசமுத்திரம் அம்பானி'யைத் தயாரித்தவரும் அவரே. இப்போது மீண்டும் தயாரிப்பில் இறங்கியுள்ளார். படத்தின் பெயர் 'ரகளைபுரம்'. ஹீரோ-காமெடியன்-தயாரிப்பாளர் கருணாஸ்தான். இவருக்கு இந்தப் படத்தில் ஜோடியாக நடிப்பவர் அங்கனா. கவர்ச்சியின் கடைசி எல்லை வரை ஒரு கை பார்க்கப் போவதாக களமிறங்கியிருக்கும் 'ரேணிகுண்டா' அஞ்சனா சிங்கும் படத்தில் உண்டு. கோவை சரளா முக்கிய வேடத்தில் நடிக்கிறார். மற்றபடி கருணாஸின் வழக்கமான காமெடி பட்டாளம் இதில் களமிறங்குகிறது. வைரமுத்துவின் பாடல்களுக்கு ஸ்ரீகாந்த் தேவா இசையமைக்கிறார். சுந்தர் சி உதவியாளராக இருந்த மனோ இயக்குகிறார். "படத்தின் முதல் காட்சியிலிருந்து கடைசி வரை இரண்டரை மணி நேரம் போனதே தெரியாமல் பார்த்துக் கொள்வது எங்கள் பொறுப்பு," என்கிறார் கருணாஸ்.

பாடகி அனுஷாவின் ஃபேஷன் ஷோவில் சிம்பு, டாப்ஸி!!!

Sunday, April, 08, 2012
சென்னை::‘மங்காத்தா’ படத்தில் பாடியவர், அனுஷா தயாநிதி. இவர், மத்திய அமைச்சர் மு.க.அழகிரியின் மருமகள். தற்போது ‘நெஃபர்டரி’ என்ற அமைப்பை தொடங்கியுள்ளார். இந்நிறுவனம் சார்பில் கிண்டி லீ ராயல் மெரிடியன் ஓட்டலில், வரும் 15-ம் தேதி பேஷன் ஷோ நடத்துகிறார். இதுபற்றி நிருபர்களிடம் அனுஷா தயாநிதி கூறியதாவது: ஃபேஷன் ஷோவுக்காக எகிப்து அரண்மனை மாதிரி பிரமாண்ட அரங்கு அமைக்கப்படுகிறது. அதிநவீன 3 டி தொழில்நுட்ப முறையில், நிகழ்ச்சியை 3டி கண்ணாடி இல்லாமல் பார்த்து ரசிக்கலாம். டாப் மாடல்கள் 26 பேர் பங்கேற்கும் பேஷன் ஷோ நிகழ்ச்சியில் பாலிவுட்டைச் சேர்ந்த நர்கீஸ் பஹ்ரி மற்றும் சிம்பு, ஆர்யா, ஜீவா, சித்தார்த், டாப்ஸி, சோனியா அகர்வால் ஆகியோர் பங்கேற்கின்றனர். இறுதியில் எங்கள் அமைப்பு சார்பில், அரவிந்த் பவுண்டேஷன் மூலமாக, மனவளர்ச்சி குன்றிய குழந்தைகள் நல்வாழ்வுக்காக நிதியுதவி வழங்கப்படுகிறது.

காமெடிக்கு வயசே கிடையாது பாராட்டு விழாவில் நடிகை சச்சு பேச்சு!!!

Sunday, April, 08, 2012
சென்னை::காமெடிக்கு வயசே கிடையாது காமெடியை விரும்பித்தான் நடித்தேன் என்று நடிகை சச்சு கூறினார். தி.நகரில் உள்ள ஸ்ரீ கிருஷ்ண கான சபாவில் சித்திரை நாடக விழா மற்றும் நடிகை சச்சுவுக்கு பாராட்டு விழாவையும் சபாவை சேர்ந்தவர்கள் ஏற்பாடு செய்திருந்தனர். இவ்விழாவில் நாடகம் மற்றும் சினிமாவில் சிறப்பாக நடித்திருப்பதை பாராட்டும் விதமாக நடிகை சச்சுவுக்கு நாடக சிரோன்மணி விருது வழங்கி சபா குழுவினர் பாராட்டினார்கள். விருதைப்பெற்றுக்கொண்ட பின்னர் நடிகை சச்சு கூறியதாவது:- எனக்கு முதல் படம் ராணி கோயம்புத்தூர் ஜூபிடர் பிக்சர்ஸ் மூலம் அறிமுகமானேன். தொடர்ந்து பல மொழிகளில் 500-க்கும் மேற்பட்ட படங்களில் நடித்திருக்கிறேன். படம் நடிக்கும் போது டி.எஸ்.பாலையாதான் நாடகத்தில் நடிக்க கட்டாயப்படுத்தினார். வாணிகலா மந்தீர் சபா மூலம் நாடகத்தில் நடித்தேன். பிறகு 20 நாடகங்கள் தயாரித்துள்ளேன். 1500 நாடகங்கள் ஸ்டேஜ் செய்திருக்கிறேன். எனக்கு எங்க அப்பா அம்மாவை விட என் பாட்டிதான் குரு. அவர் தான் முதல் டயலாக் சொல்லிக்கொடுத்தார். அப்போதெல்லாம் ட்ராமா இல்லாம படத்தில் ஒரு டயலாக் பேச முடியாது. இப்படி டயலாக் பேசி நடித்த பல படங்கள் பெரிய வெற்றியை கொடுத்தது. குறிப்பாக வீரத்திருமகன், அன்னை இல்லம் , என பல படங்களை சொல்ல முடியும். எம்.ஜி.ஆர். அண்ணன் கூட நடித்துக் கொண்டிருக்கும் போது திடீர் என்று நாடக குழுவை சேர்ந்தவர்கள் நடிக்க கூப்பிடுவார்கள். அண்ணனிடம் சொல்வேன் நாடகம் தான் முக்கியம் உடனே போ என்று சொல்லுவார். அந்தளவுக்கு நாடகத்தின் முக்கியத்துவத்தை அறிந்தவர்கள் தமிழ் சினிமாவில் இருந்திருக்கிறார்கள் விசு, ரமணி, வெங்கட் என பலர் நாடகத்தை அழகாக அமைத்துக் கொடுத்தவர்களில் குறிப்பிடலாம்.
நாடகங்கள் மூலம் சினிமாவிற்கு வந்த வாய்ப்புகளை சரியாக பயன்படுத்திக்கொண்டேன் இதில் காமெடிக்கு முக்கியத்துவம் கொடுத்து வந்த வாய்ப்புகள் அதிகம். காமெடிக்கு வயசே கிடையாது, காமெடியை சந்தோஷமாகத்தான் ஏற்றுக்கொண்டேன். இன்று எல்லோரும் பாராட்டும் படி உங்கள் முன் நிற்கிறேன். இங்கே இன்னொரு விஷயத்தையும் சொல்ல வேண்டும். தமிழக முதல்வர் ஜெயலலிதா எனக்கு பொருத்தமான அருமையான ஒரு பணியை இயல் இசை நாடக மன்றத்தின் மூலம் கொடுத்திருக்கிறார். அவர்களுக்கு காலம் முழுவதும் நன்றி கடன் பட்டுயிருக்கிறேன். இதன் மூலம் நலிந்த கலைஞர்களுக்கு உதவி செய்வேன். என்னை பாராட்டிய ஸ்ரீ கிருஷ்ணா நாடக சபா குழுவினர் அனைவருக்கும் என் நன்றியை தெரிவித்துக்கொள்கிறேன். இவ்வாறு அவர் கூறினார். இவ்விழாவில் இயக்குனர் எஸ்.பி.முத்துராமன் நடிகைகள் காஞ்சனா, பாடகி பி.சுசிலா ராஜசுலோசன ராஜஸ்ரீ வைஜெயந்திமாலா, சித்ராலயா கோபு, நடராஜ் (டி.என்.பி.எஸ்சி குழு தலைவர்) சச்சுவின் அக்கா மாடிலட்சுமி, இசையமைப்பாளர் தேவா என பலர் கலந்துக் கொண்டனர் .விழாவை சபாவை சேர்ந்த ஒய். பிரபு கவனித்தார்.

படவிளக்கம்
ஸ்ரீ கிருஷ்ணகான சபாவில் நடிகை சச்சுவுக்கு நாடக சிரோன்மணி விருது வழங்கப்பட்டது. அப்போது நடராஜ் (டி.என்.பி.எஸ்சி தேர்வு குழு தலைவர் ) நடிகைகள் காஞ்சனா, வைஜெயந்திமாலா, ராஜஸ்ரீ, ராஜசுலோசனா, பாடகி பி.சுசிலா ஆகியோர் உள்ளனர்.