Sunday, January 8, 2012

சென்னை உள்ளிட்ட 4 நகரங்கள் ரஹ்மான் இசைநிகழ்ச்சி!

Sunday, January 08, 2012
சென்னை, மும்பை, டில்லி, கோல்கட்டா, என 4 நகரங்களில் ஆஸ்கார் நாயகன் ஏ.ஆர்.ரஹ்மானின் பிரமாண்ட இசை நிகழ்ச்சி நடைபெற உள்ளது. விரைவில் நடைபெறவிருக்கும் இந்த இசை நிகழ்ச்சி பற்றிய மற்ற விவரங்கள் இன்னும் வெளியாகவில்லை. ஒரு தமிழனாக பிறந்து உலகமே வியக்கும் இயக்குனரான ஸ்பீல்பெர்க் படத்திற்கே இசையமைத்து கொண்டிருக்கும் ரஹ்மானின் இந்த இசை நிகழ்ச்சி தகவல் அவரது ரசிகர்களுக்கு இன்ப அதிர்ச்சியாக இருக்கும்.

ஏனென்றால் ரஹ்மான் இதுபோன்ற இசை நிகழ்ச்சிகளை இதுவரை நடத்தியதே இல்லை என்று சொல்லும் அளவுக்கு மிக மிக பிரமாண்டமாக நிகழ்ச்சியை நடத்த திட்டமிட்டு வருகிறார்கள் நிகழ்ச்சி ஒருங்கிணைப்பாளர்கள். மேலும் ரஹ்மானின் இசைப்பள்ளியில் சேர்ந்து இசை பயின்று வரும் மாணவர்களும், இந்த நிகழ்ச்சியில் பங்கேற்று அமர்க்களப்படுத்த உள்ளனர் என்பது இந்த இசை நிகழ்ச்சியின் இன்னொரு ஹைலைட். மேற்படி நான்கு நகரங்களில் நடக்கும் இசைநிகழ்ச்சியில் இந்த மாணவர்களும் பங்கு பெற உள்ளனராம்.

விக்ரம் நடிக்கும் இந்தி படத்தில் தபு!

Sunday, January 08, 2012
ராவணன் படத்திற்கு மீண்டும் ஒரு இந்தி படத்தில் விக்ரம் நடிக்கிறார் என்று ஏற்கனவே செய்தி வெளியிட்டு இருந்த‌ோம். இப்போது அந்த படத்தில் பாலிவுட் நடிகை தபுவும் இணைந்துள்ளார். கோலிவுட்டில் முன்னணி நடிகராக வலம் வந்து கொண்டிருக்கும் விக்ரமை பாலிவுட்டில் அறிமுகப்படுத்தியவர் மணிரத்னம். அவர் இயக்கிய ராவணன் படத்தில் விக்ரம் நடித்தார். தமிழ் மற்றும் இந்தியில் உருவான இப்படம் சரியாக போகவில்லை என்றாலும், அந்த படத்தில் நடித்த விக்ரமிற்கு நல்ல பெயர் கிடைத்தது. இந்நிலையில் மீண்டும் ஒரு இந்தி படத்தில் விக்ரம் நடிக்கவுள்ளார். மணிரத்னத்திடம் உதவியாளராக இருந்த பிரபல மலையாள டைரக்டர் பிஜாய் நம்பியார் தான் இந்தபடத்தை இயக்குகிறார். படத்திற்கு டேவிட் என பெயரிட்டுள்ளனர். இதில் விக்ரம் கொள்ளைக்காரனாக நடிக்கிறார்.

இந்நிலையில், விக்ரமுடன் சேர்ந்து ஒரு முக்கிய கதாபாத்திரத்தில் பாலிவுட் நடிகை தபுவும் நடிக்கவுள்ளார். இதுகுறித்து டைரக்டர் பிஜாய் நம்பியார் கூறுகையில், தபு நடிப்பது உண்மை தான். படத்தில் அவருடைய கேரக்டர் ரொம்பவே முக்கியத்துவம் வாய்ந்தது. அந்த ரோலுக்கு அவர்தான் பொறுத்தமானவர் என்பதால் அவரை தேர்வு செய்தேன். விரைவில் படத்தின் சூட்டிங் துவங்குகிறது. இந்தாண்டு இறுதியில் படம் திரைக்கு வரும் என்றார்.

எம்.ஜி.ஆர்., கமல், அஜித் மாதிரியான ஹீரோக்களை அறிமுகப்படுத்துங்கள்: சுஹாசினி வேண்டுகோள்!

Sunday, January 08, 2012
ஹீ‌ரோயின்களை மட்டும் அழகாக உள்ளவர்களை அறிமுகப்படுத்துகிறீர்களே, அதேபோல் ஹீரோக்களையும் அழகாக உள்ளவர்களை அறிமுகப்படுத்துங்கள் என்று வேண்டுகோள் விடுத்துள்ளார் நடிகை சுஹாசினி. நட்டி குமார் இயக்கத்தில் கணேஷ் வெங்கட்ராம் நடித்துள்ள பனிதுளி படத்தின் ஆடியோ ரிலீஸ் விழாவில் சென்னையில் நடந்தது இதில் நடிகை சுஹாசினியும் சிறப்பு விருந்தினராக கலந்து கொண்டார்.

விழாவில் ‌பேசிய நடிகை சுஹாசினி, நான் ஒரு நடிகையாகவோ அல்லது சினிமா சார்ந்தவராக இல்லாமல் ஒரு சாதரண பெண்ணாக, ஒரு ரசிகையாக ஒரு கோரிக்கை வைக்கிறேன். ஒரு படத்தில் நடிகையை மட்டும் அறிமுகப்படுத்தும் போது அவர் அழகாக இருக்கிறாரா என்று பார்க்கிறீர்கள். ஏன் ஹீரோக்களுக்கு அப்படி பார்ப்பதில்லை. எம்.ஜி.ஆர், கமல், அரவிந்த் சாமி, அஜித் போன்ற ஹேண்ட்சம் ஹீரோக்களை தமிழ் ரசிகைகளுக்கு அறிமுகப்படுத்த வேண்டுகிறேன். ரசிகருக்கு மட்டும் அழகான ஹீரோயின்களை அறிமுகப்படுத்துகிறீர்களே... ரசிகைகளுக்கும் அழகான ஹீரோக்களை அறிமுகப்படுத்த வேண்டுகிறேன் என்று கூறினார்.